दामाखेड़ा जाबो
दामाखेड़ा के मेला जाबो
दामाखेड़ा के मेला जाबो न,
दामाखेड़ा के मेला जाबो न।
गुरु चरण के,चरण अमिरत पाबो न,
दामाखेड़ा के मेला जाबो न।
जिनगी पहावत हे तोर-मोर म,
कर लेबो गुरु सुमिरन उही ठउर म।
सदगुरु'कबीर' के,गुन गाबो न
दामाखेड़ा के मेला जाबो न।
जनसेवा ले तैं पुन कमाले,
इही काम म,तैं मन लगाले।
गुरु के देवल सत्यनाम,नइ भुलाबो न,
दामाखेड़ा के मेला जाबो न।
मद-मोह के मायाजाल ले,
मुक्ति मिलही तैं जान ले।
ये जग के मेला ठेला,अउ नइ आबो न,
दामाखेड़ा के मेला जाबो न।
जीतेन्द्र निषाद'चितेश'
सांगली,जिला-बालोद
Comments
Post a Comment