जयकरी छंद

भीगे चना

खावव चना-फुटेना रोज। कुष्ठ रोग हा भागे सोज।।

आरुग हावय सरल सुझाव। रतिहा बोरव बिहने खाव।।

खाली पेट जेन हा खाय। चर्बी ओकर घटते जाय।।

कँगला मन बर हरे बदाम। कम कीमत मा चमकै चाम।।

होय फाइबर ले भरपूर। करथे उदर रोग ला दूर।।

खून साफ कर नस मा भेज। करथे बड़ दिमाक ला तेज।।

भीगे चना सबो झन खाव। नान्हें बड़का रोग भगाव।।

एक मुठा मा हावय जोर। खावय रोगी भागय खोर।।

क्लोरोफिल फास्फोरस संग। मिनरल के मिलथे नवरंग।।

देथे तन ला ऊर्जा फेर। नइ लागय मनखे ला ढेर।।

भीगे चना संग गुड़ खाव। अउ खोए पुरुषत्व जगाव।।

एकर कतका करँव बखान। अब्बड़ गुण के हरे खदान।।